Што се случува кога просторот околу училиштето престанува да биде транзитна сообраќајна зона и повторно станува место за движење, игра и учење? Одговорот е едноставен, но силен – се менува начинот на кој децата го доживуваат својот град.
По активностите во ООУ „Петар Поп Арсов“, концептот на „училишни улици“ го продолживме и во ООУ „Св. Климент Охридски“ во Драчево, каде уште еднаш се покажа колку е важна безбедната и активната мобилност во секојдневието на учениците.
Во рамки на активностите, улиците во непосредна близина на училиштето беа привремено затворени за сообраќај и трансформирани во безбедна училишна зона. Просторот кој вообичаено е исполнет со возила, доби нова функција – простор за игра, учење и слободно движење. Оваа промена овозможи децата директно да го почувствуваат градот како побезбедно и попријателско место.
Учениците активно учествуваа во различни едукативни и практични активности. Преку велосипедски предизвици, тие ги тестираа своите вештини за рамнотежа, координација и контрола, додека истовремено развиваа поголема самодоверба во учеството во сообраќајот. Интерактивните игри посветени на сообраќајните знаци и правилата им помогнаа подобро да разберат како функционира безбедното движење во урбана средина.
Креативниот дел од програмата даде дополнителна вредност. Дел од учениците создаваа пораки и визуелни знаци за побезбедни улици, додека други учествуваа во уредување и разубавување на Вело Буре паркинзите, давајќи им нова естетска и функционална димензија.
Овие активности уште еднаш ја отвораат важната дискусија за иднината на урбаните простори околу училиштата. Потребни се побезбедни училишни зони, инфраструктура која го приоритизира детето и услови кои овозможуваат активна мобилност како дел од секојдневниот живот.
Кога улицата се менува, се менува и искуството на детето. А токму тоа е првиот чекор кон поодржлив, побезбеден и поинклузивен град.
Активноста е дел од Еразмус+ проектот „School Streets: Enjoy Your Journey to School“ (референтен број: 2024-1-HU01-KA220-SCH-000245303), финансиран од Европската Унија.
Изразените ставови и мислења се ставови на авторот/авторите и не ги одразуваат нужно ставовите на Европската Унија или на Европската Извршна агенција за образование и култура (EACEA). Ниту Европската Унија ниту EACEA не можат да бидат одговорни за нив.
