Настан: Вело Родео
Каде: Едукативен центар за зачувување на природата Негрево-Пехчево
Кога: 22.09.2020
Учесници: Ученици од основното училиште, родители, наставници
ООУ „Ванчо Китанов“ од Општина Пехчево е наша долгогодишна вело членка, во рамки на програмата Вело Училишта. Меѓусебната соработка е одлична и спроведувањето на вело активностите се одвиваат непречено во текот на учебната година. За прв пат оваа година, од страна на Здружението на Граѓани Еко Логик, се организираше препознатливиот настан Вело Родео во рамки на Европската недела на мобилност. Вело Родео е настан кој се препознава по постојаните насмевки на децата и младите кои учествуваат, и нивната енергија со која неуморно го практикуваат специјално подготвениот полигон. Детската неуморност, ентузијазам, желба за возење на велосипед, како и желба за учење на нови нешта е тоа вистинското чувство што не мотивира за организирање на настани од ваков вид. Специјално подготвениот полигон им овозможува на сите учесници од најмала возраст, па се до оние поголемите, да ги практикуваат своите вештини, но и истите да ги унапредат, како и да се запознаат со потребните сообраќајни знаци, со цел безбедно возење на својот велосипед. Додека едукативните игри, кои исто така ја обработуваат темата за велосипедизам, ја поттикнуваат нивната љубопитност, интерес, и желба за учење на нови нешта на еден поинаков и забавен начин. Оваа година Вело Родео настанот е препознатлив и по својата патувачка изложба, на која се поставени пристигнатите цртежи од минатогодишниот ликовен и литературен конкурс, кој се одржа во рамки на Вело Родео турнејата, како и ликовната работилница на која сите учесници имаат можност да ја изразат својата креативност и имагинативност.
Како поминавме на Вело Родео во Пехчево?
Незаборавно. Посебно сакаме да го истакнеме и поздравиме моментот што сите ученици заедно со нивните наставници и родители кои учествуваа на целиот настан, возејќи велосипед пристигнаа во Едукативниот центар во Негрево. Оддалеченоста од Пехчево до центарот е околу три километри, и тие беа придружувани од преставници на Министерството за Внатрешни Работи, како и од амбулантно возило. Дружењето со најмладите, беше елан за нас организаторите и возрасните. Детската неуморност и желба за возење велосипед, игри и креативно творење беше долготрајно. Позитивните коментари, и впечаток на сите присутни е чувството со кое си заминавме, со искрена желба да се видиме набрзо, на повторно дружење.
